Azərbaycanda altı ayda 130-dan çox orqan və toxuma transplantasiyası icra olunub

Azərbaycanda bu ilin yanvar–iyun aylarında 130-dan çox orqan və toxuma transplantasiyası həyata keçirilib. Onlardan 30-a yaxını meyit donorlardan götürülən orqan və toxumalar hesabına icra olunub. Bu barədə Səhiyyə Nazirliyinin Orqan Donorluğu və Transplantasiyası üzrə Koordinasiya Mərkəzi bildirib.

Mərkəzin "Report"un sorğusuna cavab olaraq verdiyi məlumata görə, meyit donorlar hesabına həyata keçirilən transplantasiyalar çərçivəsində böyrək, qaraciyər, ürək və buynuz qişa köçürülməsi uğurla icra edilib.

Ümumilikdə, hesabat dövründə ölkədə 60-a yaxın böyrək, 30-a yaxın qaraciyər, 20-dən çox sümük iliyi və 25-ə yaxın buynuz qişa transplantasiyası həyata keçirilib.

Azərbaycanda meyit donorlarından orqan transplantasiyası sistemi 2022-ci ildə qüvvəyə minən "İnsan orqan və toxumalarının donorluğu və transplantasiyası haqqında" qanun əsasında tətbiq olunur.