Tehranda Əli Xamenei ilə vida mərasimi keçirilir

İranın paytaxtı Tehranda minlərlə insan ABŞ və İsrailin zərbələri nəticəsində həlak olmuş İranın Ali Lideri Ayətullah Əli Xamenei ilə vida mərasimində iştirak edir.

İran mediasının məlumatına görə, yürüş şəhərin əsas prospektləri – Demavənd, Azadi və Engelab küçələri boyunca təşkil olunub və iştirakçılar Engelab meydanında toplaşıblar. Mərasimdə iştirak edənlər Əli Xameneinin, eləcə də onun varisi kimi təqdim edilən oğlu Müctəba Xameneinin portretlərini, İran bayraqlarını və matəm simvollarını daşıyıblar.

Mərasim zamanı izdiham İsrail və ABŞ əleyhinə şüarlar səsləndirib, həmçinin Livan və Qəzzaya dəstək ifadə edən bannerlər nümayiş etdirib.

İran rəsmilərinin açıqladığı plana əsasən, vida mərasimləri növbəti gün Qum şəhərində davam edəcək. Daha sonra cənazənin İraqın Bağdad, Nəcəf və Kərbəla şəhərlərinə aparılması, iyulun 9-da isə Məşhəd şəhərində dəfn edilməsi nəzərdə tutulur.

Əli Xameneinin ölümü ABŞ və İsrailin İrana endirdiyi zərbələrdən sonra baş verib. Onun dəfn mərasimləri ölkə daxilində və regionda yüksək təhlükəsizlik tədbirləri altında keçirilir və müxtəlif ölkələrdən rəsmi nümayəndə heyətlərinin iştirakı gözlənilir.

Gülnar Nazimqızı