DYP küləkli hava ilə bağlı sürücülərə və piyadalara xəbərdarlıq edib

Baş Dövlət Yol Polisi İdarəsi (BDYP) ölkə ərazisində müşahidə olunan küləkli hava şəraiti ilə əlaqədar hərəkət iştirakçılarına xəbərdarlıq edib.

Daxili İşlər Nazirliyinin Baş Dövlət Yol Polisi İdarəsindən verilən məlumata görə, hazırda Bakıda və Abşeron yarımadasında, eləcə də bir sıra bölgələrdə küləkli hava şəraiti ilə bağlı sarı və narıncı xəbərdarlıq qüvvədədir.

Qurum əlverişsiz hava şəraitinin yollarda yarada biləcəyi təhlükələri nəzərə alaraq sürücüləri və piyadaları yol hərəkəti qaydalarına ciddi əməl etməyə çağırıb.

Xəbərdarlıqda bildirilib ki, qoşqulu, tentli və uzunölçülü yük avtomobillərinin sürücüləri daha diqqətli olmalı, daşınan yükün etibarlı şəkildə qablaşdırılmasına xüsusi nəzarət etməlidirlər.

BDYP həmçinin sürücülərə nəqliyyat vasitələrini aşma və ya sürüşmə riski olan obyektlərin yaxınlığında saxlamamağı, imkan daxilində qapalı dayanacaqlardan istifadə etməyi tövsiyə edib.

Qeyd olunub ki, açıq ərazilərdə küləyin yaratdığı toz dumanı səbəbindən görünüş məsafəsi məhdudlaşdığından sürücülər sürət həddini və ara məsafəsini nəzarətdə saxlamalı, ötmə və manevr zamanı xüsusilə ehtiyatlı davranmalıdırlar.

İdarə piyadalara da hava şəraitini düzgün qiymətləndirməyi və yollarda özlərinin, eləcə də digər hərəkət iştirakçılarının həyat və sağlamlığını təhlükə altına atan davranışlardan çəkinməyi tövsiyə edib.