"Komedixana" 2026-cı ilin ilk yarısında Azərbaycanın ən çox izlənilən televiziya proqramı olub

2026-cı ilin yanvar-iyununda Azərbaycanda ən çox izlənilən televiziya proqramı Xəzər TV-də yayımlanan "Komedixana" olub.

Yeniavaz.com-un televiziya kanallarının auditoriya reytinqlərini ölçən "Marsa" şirkətinin məlumatlarına istinadən verdiyi xəbərə görə, veriliş yanvar, fevral, mart, aprel, may və iyun aylarının hər birində reytinq cədvəlinin ilk pilləsində qərarlaşıb.

Məlumata əsasən, ilk yarımildə açıqlanan TOP-15 reytinq siyahısına daxil olan proqramların yarısı Xəzər TV-nin payına düşüb.

"Marsa"nın 2026-cı ilin yanvar-iyun aylarını əhatə edən hesabatında ümumilikdə 32 fərqli televiziya proqramı və yayım yer alıb. Bunlardan 16-sı Xəzər TV-yə, 7-si ARB TV-yə, 4-ü ATV-yə, 3-ü Space TV-yə məxsus olub. CBC Sport TV və İctimai Televiziya (İTV) isə yalnız UEFA Çempionlar Liqasının oyunlarının yayımı ilə siyahıya daxil olublar.

Hesabata görə, AzTV, ARB 24, Real TV, Mədəniyyət TV, İdman TV və digər televiziya kanallarının heç bir proqramı 2026-cı ilin ilk yarısında TOP-15 reytinq siyahısında yer almayıb.