Xırdalanda ər və arvad bir-birini bıçaqlayıb - Yenilənib

Respublika Təcili və Təxirəsalınmaz Tibbi Yardım Mərkəzinə Abşeron rayonu, Xırdalan şəhəri, M. Hüseynzadə küçəsi ərazisindən çağırış qeydə alınıb. Bu barədə TƏBİB-dən məlumat verilib.

Bildirilib ki, təcili tibbi yardım briqadası tərəfindən bir kişinin həkiməqədər ölüm faktı qeydə alınıb.

Qadın isə Abşeron Rayon Mərkəzi Xəstəxanasına hospitalizasiya olunub. Boyun nahiyəsinin, başın, döş qəfəsinin, saidin, çiyin və bazu nahiyələrinin açıq və çoxsaylı yaralanmaları, qarın divarının kontuziyası diaqnozları təyin edilən şəxsin vəziyyəti orta ağır qiymətləndirilir.

Müvafiq laborator və instrumental müayinələr aparıldıqdan sonra pasiyent cərrahi əməliyyata alınıb.

16: 37

Abşeron rayonunun Xırdalan şəhərində baş verən ailə münaqişəsi ölümlə nəticələnib.

İlkin məlumata görə, ər və arvad arasında yaşadıqları evdə yaranan mübahisə zamanı tərəflər bir-birinə bıçaqla xəsarətlər yetiriblər. Hadisə nəticəsində kişi aldığı xəsarətlərdən hadisə yerində ölüb. Ağır yaralanan qadın xəstəxanaya çatdırılsa da, həkimlərin səylərinə baxmayaraq onun həyatını xilas etmək mümkün olmayıb.

Sonradan hadisə ilə bağlı bəzi məqamlar dəqiqləşib. Məlum olub ki, Xırdalan şəhər sakini olan kişi əvvəlcə həyat yoldaşına bıçaqla xəsarət yetirib, daha sonra özünə də xəsarətlər endirib. Kişi hadisə yerində ölüb, qadın isə ağır vəziyyətdə xəstəxanaya aparılıb. Lakin daha sonra qadın da xəstəxanada vəfat edib.

Hazırda ölən şəxslərin kimliyi dəqiqləşdirilir.

Faktla bağlı hüquq-mühafizə orqanları tərəfindən araşdırma aparılır.