Azərbaycanda vergi daxilolmaları yeddi ayda 11,5 milyard manatı ötüb

2026-cı ilin yanvar–iyul aylarında İqtisadiyyat Nazirliyi yanında Dövlət Vergi Xidmətinin xətti ilə dövlət büdcəsinə 11 milyard 474,1 milyon manat vergi daxil olub ki, bu da proqnozdan 848,1 milyon manat çoxdur.

Dövlət Vergi Xidmətinin məlumatına görə, vergi daxilolmaları ötən ilin eyni dövrü ilə müqayisədə 913,3 milyon manat və ya 8,6% artıb.

Qeyri-neft-qaz sektorundan vergi daxilolmaları 8 milyard 488,8 milyon manat təşkil edib. Bu göstərici proqnozu 251,8 milyon manat üstələyib və illik müqayisədə 898,4 milyon manat və ya 11,8% artım deməkdir.

Yanvar–iyul aylarında məcburi dövlət sosial sığorta haqları üzrə daxilolmalar 4 milyard 37,3 milyon manata çatıb ki, bu da proqnozdan 229,4 milyon manat çoxdur. Qeyri-büdcə təşkilatları üzrə daxilolmalar 2 milyard 687,2 milyon manatdan artıq olub.

Hesabat dövründə işsizlikdən sığorta haqları üzrə daxilolmalar 143,5 milyon manat təşkil edib. Bu göstərici proqnozu 6,8 milyon manat üstələyib, qeyri-büdcə təşkilatları üzrə daxilolmalar isə 110,2 milyon manata yaxın olub.

İcbari tibbi sığorta haqları üzrə daxilolmaların həcmi isə 606,8 milyon manata yaxın olub. Bu sahədə daxilolmalar proqnozdan 15,6 milyon manat çox olub, qeyri-büdcə təşkilatları üzrə daxilolmalar isə 402,4 milyon manata yaxın təşkil edib.

Gülnar Nazimqızı