Məişət zorakılığından zərərçəkən 25 uşaq reabilitasiya olunub

Bu ilin əvvəlindən Azərbaycanda məişət zorakılığından zərər çəkmiş 41 nəfər sosial reabilitasiya xidmətlərinə cəlb olunub. Bu barədə Əmək və Əhalinin Sosial Müdafiəsi Nazirliyinin (ƏƏSMN) məlumatında bildirilir.

Məlumata görə, sosial reabilitasiya xidmətlərindən yararlananların 25-i uşaqdır.

Zərərçəkmiş şəxslər ƏƏSMN-nin tabeliyində Sosial Xidmətlər Agentliyinin müvafiq müəssisəsində fəaliyyət göstərən Məişət zorakılığından zərər çəkmiş şəxslər üçün sosial reabilitasiya şöbəsində xidmətlərə cəlb ediliblər.

Onların sosial reabilitasiyası və sosial statuslarının bərpası məqsədilə fərdi iş planları hazırlanıb və həmin planlar əsasında müvafiq işlər aparılıb.