Dünyanın ən aqressiv sürücüləri hansı ölkədədir?

İtaliya sürücülərin aqressiv davranışları ilə bağlı ən çox qeyd olunan ölkə olub. Sorğuda iştirak edənlərin 23%-i bu ölkədə aqressiv və ya təhlükəli sürücülüklə qarşılaşdığını bildirib.Bu nəticə avtomobil icarəsi üzrə beynəlxalq müqayisə platforması DiscoverCars.com-un 2026-cı ilin aprelində keçirdiyi sorğuda əksini tapıb.

Sorğuda platformanın 713 müştərisi iştirak edib. Respondentlərdən yollarda aqressiv sürücülüklə bağlı təcrübələrini, həmçinin bu davranışla daha çox əlaqələndirdikləri ölkə və şəhərləri qeyd etmələri istənilib.

Ölkələr üzrə siyahıda Böyük Britaniya 11%-lə ikinci, ABŞ 9%-lə üçüncü yerdə qərarlaşıb. Fransa və Avstraliya 5%-lə dördüncü yeri bölüşüb. İspaniya və Türkiyə isə 4%-lə beşinci olub.

Şəhərlər arasında London ən çox qeyd olunan şəhər olub. İtaliyanın Neapol şəhəri ikinci, Roma isə üçüncü yeri tutub.

Sorğuda sürücüləri ən çox qıcıqlandıran davranışlar da müəyyənləşdirilib. Respondentlərin 56%-i dönmə işıqlarından istifadə etməməyi ən əsəbiləşdirici davranış kimi göstərib.

Qarşıdakı avtomobilə həddindən artıq yaxın məsafədə hərəkət etmək 46%, ötmə zolağında yavaş sürmək 43%, sürücünün diqqətinin yayınması 39%, qəfil əyləcləmə isə 20% respondent tərəfindən qeyd olunub.

Respondentlərdən yaşadıqları ölkədə sürücülərin davranışını 1-dən 5-dək qiymətləndirmələri də istənilib. Ən azı 20 respondent tərəfindən qiymətləndirilən ölkələr arasında İtaliya 3,5 balla ən aqressiv sürücülük göstəricisinə malik olub. Yeni Zelandiya və ABŞ 3,4 balla növbəti yerlərdə qərarlaşıb.

Ən sakit sürücülük göstəricisi isə Avstraliyada qeydə alınıb – 2,7 bal. Kanada 2,8, Fransa və Niderland isə 2,9 bal toplayıb.

Gülnar Nazimqızı