2030-cu ilə qədər 299 yeni vaqon alınacaq

Bakı Metropoliteni 2030-cu ilədək Bənövşəyi xətt üçün 299 yeni vaqon almağı planlaşdırır. Bunu “Bakı Metropoliteni” QSC-nin baş mühəndisi Namiq Yusubov anews.az-ın sualına cavab verərkən bildirib.

“Hazırda Bakı Metropolitenində 71 qatar tərkibi mövcuddur. Bənövşəyi xətdə köhnə qatar tərkibləri istismar olunur. 2030-cu ilədək həmin xətt üzrə 299 vaqonun alınması nəzərdə tutulub”, - Yusubov deyib.

Onun sözlərinə görə, yeni hərəkət tərkiblərinin alınması yalnız Bənövşəyi xəttlə məhdudlaşmayacaq.

Qırmızı və Yaşıl xətlərdə qatarlararası intervalın azaldılması üçün həyata keçirilən infrastruktur layihələri başa çatdıqca bu xətlər üçün də əlavə qatarların alınması nəzərdə tutulur.

Yusubov bildirib ki, Qırmızı xətdə “İçərişəhər” stansiyasında dalan yolunun tikintisi intervalın azaldılmasına imkan verəcək. Yaşıl xətdə isə gələcək Y-14 və Y-15 stansiyalarının tikintisi və dönmə kamerasının yaradılmasından sonra qatarların daha sıx intervalla hərəkətinin təşkili mümkün olacaq.

Bakı Metropoliteni paytaxtın metro şəbəkəsinin genişləndirilməsi proqramı çərçivəsində mövcud Qırmızı, Yaşıl və Bənövşəyi xətlərin infrastrukturunun inkişaf etdirilməsini və yeni stansiyaların tikintisini planlaşdırır.

Yaşıl və Qırmızı xətlərin ayrılması layihəsi də bu proqramın əsas hissələrindən biridir.

Xətlərin ayrılmasından sonra Qırmızı xətt üzrə hərəkətin “Həzi Aslanov–İçərişəhər”, Yaşıl xətt üzrə isə “Dərnəgül–Nizami” istiqamətində müstəqil təşkil edilməsi nəzərdə tutulur. Metropoliten rəsmilərinin bildirdiyinə görə, ayrılma işlərinin təxminən 11 ay ərzində tamamlanması planlaşdırılır.

Gülnar Nazimqızı