Böyükşor gölünün bir hissəsinin yaşıl rəngə boyanmasının səbəbi araşdırılır

Bakıdakı Böyükşor gölünün bir hissəsinin yaşıl rəngə boyanmasının səbəbi araşdırılır.

Azərbaycan Dövlət Su Ehtiyatları Agentliyi yanında Suların İstifadəsinə və Mühafizəsinə Dövlət Nəzarəti Xidmətinin əməkdaşları avqustun 14-də gölün müəyyən hissəsində yaşıl rəngli kütlə müşahidə ediblər.

İlkin müşahidələrə görə, yaşıl rəngli kütlənin daşların səthinə yapışması, selikli və yığıntı şəklində olması, eləcə də müxtəlif yaşıl çalarlarda müşahidə edilməsi bunun yosunlarda gedən fotosintez prosesi ilə əlaqəli ola biləcəyini göstərir.

Xidmətdən bildirilib ki, avqust ayında yüksək su temperaturu, intensiv günəş işığı və suda azot və fosfor kimi qida maddələrinin mövcudluğu yosun və sianobakteriyaların inkişafı üçün əlverişli şərait yarada bilər.

Bununla belə, yaşıl kütlənin dəqiq mənşəyinin və tərkibinin müəyyənləşdirilməsi üçün Xidmətin Mərkəzi Laboratoriyasının əməkdaşları tərəfindən göldən nümunələr götürülüb.

Hazırda nümunələr üzərində laborator analizlər aparılır. Nəticələrdən asılı olaraq müvafiq tədbirlərin görüləcəyi bildirilib.