Minimum pensiya alanlar azalır, sosial müavinət alan yaşlılar artır

Azərbaycanda minimum məbləğdə əmək pensiyası alanların sayı 2026-cı il iyulun 1-nə 12 794 nəfər təşkil edib. Bu, ötən ilin eyni dövrü ilə müqayisədə 21 775 nəfər və ya 63% azdır. Bu barədə Dövlət Statistika Komitəsindən anews.az-ın sorğusuna cavab olaraq bildirilib. 

2025-ci il iyulun 1-nə minimum məbləğdə pensiya alanların sayı 34 569 nəfər olub.

Kateqoriyalar üzrə ən çox azalma əlilliyə görə minimum pensiya alanlar arasında qeydə alınıb. Onların sayı bir il ərzində 1 176 nəfərdən 363 nəfərə düşüb ki, bu da 69,1% azalma deməkdir.

Yaşa görə minimum pensiya alanların sayı 31 722 nəfərdən 11 799 nəfərə və ya 62,8%, ailə başçısını itirməyə görə minimum pensiya alanların sayı isə 1 671 nəfərdən 632 nəfərə və ya 62,2% azalıb.

Yaşa görə əmək pensiyası deyil, aylıq sosial müavinət alanların sayında əks dinamika müşahidə olunub. 2026-cı il iyulun 1-nə yaşa görə sosial müavinət alanların sayı 177,5 min nəfərə çatıb. Bu, 2025-ci ilin eyni dövründəki 166,2 min nəfərlə müqayisədə 11,3 min nəfər və ya 6,8% çoxdur. 

Bir il ərzində minimum məbləğdə pensiya alanların sayı kəskin azalarkən, əmək pensiyası hüququ olmayan və yaşa görə sosial müavinət alanların sayı artıb.

Azərbaycanda minimum əmək pensiyasının məbləği hazırda 320 manat, yaşa görə aylıq sosial müavinət isə 220 manat təşkil edir. 

Gülnar Nazimqızı