2026-cı il büdcəsində neft-qaz sektorundan vergi gəlirləri 4,25 milyard manat gözlənilir

Azərbaycanın 2026-cı il dövlət büdcəsində neft-qaz sektoru üzrə vergi daxilolmalarının 4,25 milyard manat olacağı proqnozlaşdırılır. Bu barədə Maliyyə Nazirliyindən bildirilib. 

Bu məbləğin 1,75 milyard manatı və ya 41,2%-i SOCAR-ın ödədiyi vergilərin, 500 milyon manatı və ya 11,8%-i “Azəri-Çıraq-Günəşli” (AÇG) layihəsi üzrə hasilatın pay bölgüsü sazişləri çərçivəsində fəaliyyət göstərən podratçıların mənfəət vergisinin, 2 milyard manatı və ya 47,1%-i isə “Şahdəniz” layihəsi üzrə podratçıların mənfəət vergisinin payına düşəcək.

Büdcə hesablamalarında Azərbaycan qazının bütün istiqamətlər üzrə orta satış qiyməti əvvəlki proqnozla müqayisədə 1000 kubmetr üçün 35 dollar artırılaraq 296 dollara çatdırılıb.

Qiymət proqnozunun yüksəldilməsi nəticəsində “Şahdəniz” layihəsi üzrə podratçı təşkilatların mənfəət vergisi daxilolmalarının 400 milyon manat və ya 25% artacağı gözlənilir.

2026-cı il dövlət büdcəsində vergi orqanları xətti ilə qeyri-neft-qaz sektoru üzrə 13,51 milyard manat daxilolma nəzərdə tutulur. Bu, cari il üçün təsdiqlənmiş göstəricidən 200 milyon manat və ya 1,5% çoxdur.

Yenilənmiş makroiqtisadi proqnozlara görə, 2026-cı ildə ÜDM-in nominal həcmi 138 milyard manat, qeyri-neft ÜDM-inin isə 100 milyard manat olması gözlənilir. Əvvəlki proqnozlarla müqayisədə ümumi ÜDM üzrə gözlənti yüksəldilsə də, qeyri-neft-qaz sektorunun real artım proqnozu 5%-dən 3,1%-ə endirilib.

Gülnar Nazimqızı