Pərviz Həşimli aclığı dayandırdı

Milli Təhlükəsizlik Nazirliyinin istintaq təcridxanasında saxlanan jurnalist, hüquq müdafiəçisi Pərviz Həşimli aclıq aksiyasını dayandırıb.“Media forum” saytına danışan vəkil Elçin Sadıqov bildirib ki, noyabrın 26-da Pərviz Həşimli ilə görüşüb: “Ombudsman Elmira Süleymanova noyabrın 25-də Pərviz Həşimliyə baş çəkib. Pərviz Həşimli ombudsmanın xahişini və həkimin məsləhətini nəzərə alaraq noyabrın 26-da aclıq aksiyasını dayandırıb.Görüşdən sonra qanunsuz olaraq yenə də məndən qeydlərimi götürdülər. Qeydləri vermədiyimə görə təxminən saat yarım məni orada saxladılar. Əks halda məni buraxmayacaqlarını bildirdilər. Bu üsulla qeydləri alıb, surətini çıxardıqdan sonra özümə qaytardılar”.

Vəkil onu da əlavə edib ki, noyabrın 28-i saat 12-də Pərviz Həşimlinin evində və ofisində aparılan axtarışla bağlı apellyasiya şikayətinə baxılacaq. 

Pərviz Həşimli sentyabrın 17-də digər Azərbaycan vətəndaşı Təvəkkül Qurbanovla birgə tutulub. Milli Təhlükəsizlik Nazirliyinin İstintaq Baş İdarəsi onlara odlu silahın və döyüş sursatının qaçaqmalçılığı, odlu silah, onun komplekt hissələrini və döyüş sursatını əldə etmə, saxlama, daşıma ittihamları ilə cinayət işinə başlayıb.

ANN.Az