SpaceX Luizianada 100 milyard dollarlıq nəhəng kosmik stansiya tikməyi planlaşdırır

SpaceX ABŞ-ın Luiziana ştatında təxminən 100 milyard dollar dəyərində nəhəng kosmik stansiya tikməyi planlaşdırır. Şirkətin və Luiziana ştatı hakimiyyətinin məlumatına görə, obyekt Meksika körfəzi sahilində inşa ediləcək və SpaceX-in ən böyük buraxılış mərkəzi olacaq. Ştat rəsmiləri isə layihənin dünyada ən böyük buraxılış meydançasına çevriləcəyini bildirirlər.

“Bild”in məlumatına görə, kosmik stansiyada hər birində iki platforma olmaqla beş buraxılış kompleksi yaradılması nəzərdə tutulur.

Tikinti işlərinə 2027-ci ildə başlanması, ilk “Starship” raketlərinin isə 2029-cu ildə yeni mərkəzdən buraxılması planlaşdırılır. SpaceX uzunmüddətli perspektivdə kompleksdən ildə minlərlə buraxılış həyata keçirməyi hədəfləyir.

Şirkət hazırda Texas ştatında “Starship” raketləri üçün əsas buraxılış mərkəzini inkişaf etdirir.

SpaceX-in uzunmüddətli planlarına Ay və Marsa müntəzəm uçuşların həyata keçirilməsi, həmçinin Yer kürəsindən kənarda davamlı insan varlığının yaradılması daxildir. Şirkət bu məqsədlər üçün tamamilə təkrar istifadə edilə bilən raketlərdən yararlanmağı planlaşdırır.

Gülnar Nazimqızı