DYP sürücülərə müraciət edib

Baş Dövlət Yol Polisi İdarəsi həftəsonu yollarda hərəkət intensivliyinin artacağı, bəzi ərazilərdə isə yağışlı və küləkli hava şəraitinin müşahidə olunacağı ilə bağlı sürücülərə xəbərdarlıq edib.Bu barədə idarədən məlumat verilib.

DYP sürücülərə hava və yol şəraitini nəzərə almağı, sürət həddini mövcud şəraitə uyğun seçməyi, ara məsafəsini artırmağı, kəskin manevrlər və qəfil tormozlamalardan çəkinməyi tövsiyə edib.

Bildirilib ki, yağışlı hava şəraitində yol örtüyünün sürüşkən olması və görünüş məsafəsinin azalması, küləkli havada isə nəqliyyat vasitəsinin idarəetmədən çıxma riskinin artması nəzərə alınmalıdır.

İdarə səfərdən əvvəl avtomobilin texniki vəziyyətinin, xüsusilə şinlərin, işıq cihazlarının və şüşəsilənlərin sazlığının yoxlanılmasının vacibliyini vurğulayıb.

DYP bütün hərəkət iştirakçılarını həftəsonu yol hərəkəti qaydalarına ciddi əməl etməyə və həm özlərinin, həm də digər iştirakçıların təhlükəsizliyinə diqqətlə yanaşmağa çağırıb.