Balakənin sabiq icra başçısının həbs müddəti uzadılıb

Dövlət Təhlükəsizliyi Xidmətinin (DTX) əməliyyatı zamanı saxlanılan sabiq Balakən Rayon İcra Hakimiyyətinin başçısı İslam Rzayevin həbs müddəti daha üç ay uzadılıb.

Səbail Rayon Məhkəməsində istintaq orqanının təqdimatına baxılıb və İslam Rzayev barəsində seçilmiş həbs qətimkan tədbirinin müddətinin daha üç ay uzadılması barədə qərar qəbul edilib.

İslam Rzayev ötən ilin oktyabrında DTX tərəfindən keçirilən əməliyyat zamanı saxlanılıb.

Ona Cinayət Məcəlləsinin 179.3.2-ci (külli miqdarda mənimsəmə) və 311.3.2-ci (təkrar rüşvət alma) maddələri ilə ittiham irəli sürülüb.

İslam Rzayev oktyabrın 30-da Balakən Rayon İcra Hakimiyyətinin başçısı vəzifəsindən azad edilib.