Dövlət Agentliyi “Aztelekom”un tarif və internet sürəti ilə bağlı araşdırma aparır

 Azərbaycan Prezidentinin yanında Antiinhisar və İstehlak Bazarına Nəzarət Dövlət Agentliyi “Aztelekom” MMC-nin xidmət tarifləri və təklif etdiyi internet sürəti ilə bağlı araşdırma aparır. Bu barədə Dövlət Agentliyi məlumat yayıb.

Agentlik bildirib ki, Rəqabət Məcəlləsinin 39.2.1-ci maddəsinə əsasən daxil olan müraciətlər çərçivəsində təbii inhisar subyektlərinin razılıq alınması tələb olunan hərəkətlərinə nəzarət tədbirləri həyata keçirilir.

Nəzarət tədbirləri, xüsusilə, trafikin lokallaşdırılması xidməti üzrə yeni tariflərin tətbiqi və genişzolaqlı internet xidmətləri bazarında minimum internet sürətinin müəyyən edilməsi məsələlərini əhatə edir.

“Hazırda hər iki istiqamət üzrə hərəkətlə bağlı araşdırma və təhlillər davam edir”, - Agentlik qeyd edib.