Bakıda itkin düşmüş şəxslərlə bağlı IV beynəlxalq konfrans keçiriləcək

İtkin düşmüş şəxslər üzrə Bakı Dialoqu çərçivəsində IV Beynəlxalq Konfrans oktyabrın 7-10-da Azərbaycanda keçiriləcək.Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasından bildirilib.

Məlumata görə, builki konfrans "İtkin düşmüş şəxslər məsələsinin həllində etimadın gücləndirilməsi, effektiv mexanizm və həll yollarının inkişaf etdirilməsi" mövzusuna həsr olunacaq.

Konfransda əsas diqqət tərəflər arasında etimadın formalaşdırılması və möhkəmləndirilməsinə yönəldiləcək.

Bildirilib ki, itkin düşmüş şəxslərin taleyinin müəyyənləşdirilməsində əməkdaşlıq, şəffaflıq və dəqiq məlumatların vaxtında təqdim edilməsi mühüm əhəmiyyət daşıyır.

Bu çərçivədə itkin düşmüş şəxslər, o cümlədən kütləvi və fərdi dəfn yerləri barədə məlumatların təqdim edilməsi, həmçinin münaqişə tərəflərinin itkin şəxslərin axtarışı, aşkarlanması və identifikasiyası üzrə birgə humanitar fəaliyyət imkanları müzakirə olunacaq.

Konfransın məqsədinin müzakirələrlə məhdudlaşmayaraq, etimad və əməkdaşlığı gücləndirən, ailələrin həqiqəti bilmək hüququnun təmin edilməsinə, məlumat mübadiləsinin asanlaşdırılmasına, müasir məhkəmə-tibbi, DNT və texnoloji imkanlardan istifadənin genişləndirilməsinə xidmət edən praktiki və dayanıqlı mexanizmlərin formalaşdırılmasına töhfə vermək olduğu qeyd edilib.

Tədbirdə dövlətlərin və beynəlxalq təşkilatların nümayəndələri, ekspertlər, itkin düşmüş şəxslərin ailələri və digər tərəflər iştirak edərək humanitar əməkdaşlığın konkret nəticələrə çevrilməsi yollarını müzakirə edəcəklər.