Azərbaycanda balıq ovu və məhsul dövriyyəsinə elektron nəzarət sistemi tətbiq ediləcək

Azərbaycanda balıq ovu kvotaları və ovlanan məhsullar barədə məlumatların elektron sistemdə qeydiyyatı nəzərdə tutulur. Bunu  “Balıqçılıq və Akvakultura Mərkəzi” nin direktoru Ceyhun Əliyev bildirib.

Onun sözlərinə görə, yeni “Balıqçılıq haqqında” qanun çərçivəsində sahənin elektronlaşdırılması və qanunsuz ovlanmış balıqların ticarət dövriyyəsinə buraxılmasının qarşısının alınması üçün yeni nəzarət mexanizmləri tətbiq ediləcək.

“Qanunda qanunsuz ovlanmış balıqların ticarət dövriyyəsinə buraxılmasının qadağan olunması ilə bağlı müddəalar var”, - Əliyev mətbuat konfransında deyib.

O bildirib ki, kvotalar müəyyən edildikdən sonra balıq ovu qaydalarında dəyişikliklər ediləcək.

Balıqçılar ovladıqları məhsul, akvakultura təsərrüfatları isə istehsal etdikləri məhsul barədə bəyannamələri elektron portal vasitəsilə təqdim edəcəklər.

Əliyevin sözlərinə görə, sistemdə məhsulun növü, partiyası və ölçüsü barədə məlumatlar qeydə alınacaq və məhsul ticarət dövriyyəsinə buraxılarkən bu məlumatlar Kənd Təsərrüfatı Nazirliyinin elektron sistemindən digər dövlət qurumlarının, o cümlədən qida təhlükəsizliyi sahəsində fəaliyyət göstərən qurumların informasiya sistemlərinə inteqrasiya ediləcək.

Yeni mexanizmin qanunsuz balıq ovunun və belə məhsulların satışının izlənməsinə imkan verəcəyi nəzərdə tutulur.

Gülnar Nazimqızı