Trampın portreti əks olunan 1 dollarlıq xatirə sikkəsi satışa çıxarılıb

ABŞ Zərbxanası ölkənin 250 illik yubileyi münasibətilə Prezident Donald Trampın portretinin əks olunduğu 1 dollarlıq xatirə sikkəsi buraxıb. Bununla Tramp son 100 ildə ABŞ sikkəsində portreti yer alan ilk prezident olub.

Sikkənin üzərində Trampın portreti ilə yanaşı, “Azadlıq” və “Allaha güvənirik” ifadələri həkk olunub.

ABŞ Zərbxanası 25 sikkədən ibarət dəsti 61 dollara, 100 sikkədən ibarət çantanı isə 154,50 dollara satışa çıxarıb. Buraxılışdan bir neçə saat sonra zərbxananın saytında sikkələrin tükəndiyi barədə məlumat yerləşdirilib.

Zərbxana bildirib ki, sikkə “bu tarixi mərhələni qeyd etmək” məqsədilə buraxılıb və müasir kolleksiyalara əlavə kimi nəzərdə tutulub.

Qızılı rəngdə görünməsinə baxmayaraq, sikkələrin tərkibində qızıl yoxdur. Onlar metal ərintisindən hazırlanıb.