Avqustda Bakı metrosundan 13 milyondan çox sərnişin istifadə edib

Bu ilin avqust ayında Bakı metrosunda 13 milyondan çox sərnişin səfəri qeydə alınıb, bu, ötən ilin eyni ayı ilə müqayisədə 12,22% azdır.  Bu barədə “Bakı Metropoliteni” QSC məlumat yayıb.

Avqust ayında ən çox sərnişinə “Koroğlu” stansiyası xidmət göstərib. Stansiyadan 1 milyon 400 min 424 sərnişin istifadə edib.

Avqustun 3-ü 548 min 751 sərnişinlə ayın ən çox sərnişin daşınan günü olub.

Ay ərzində NFC və QR bilet vasitəsilə 6 milyon 802 min 45 ödəniş həyata keçirilib. Bu ödənişlər metrodan istifadə edən sərnişinlərin 53,5%-ni təşkil edib. Göstərici iyul ayı ilə müqayisədə 0,5 faiz bəndi artıb.

“Əlçatan metro” xidməti çərçivəsində avqust ayında 79 sifariş icra olunub.

“Bakı Metropoliteni” QSC avqustun 15-dən Qırmızı və Yaşıl xətlərin ayrılması layihəsi üzrə əsas tikinti mərhələsinə başlayıb. Tikinti işlərinin təxminən 10-11 ay davam edəcəyi və bu müddətdə “Nizami–28 May” stansiyaları arasında qatarların hərəkət etməyəcəyi bildirilib.