Səhiyyə Nazirliyi kosmetik məhsul alarkən diqqətli olmağa çağırıb

Kosmetik məhsullar alarkən onların gigiyenik sertifikatının qüvvədə olma müddətinə, qablaşdırılmasına və son istifadə tarixinə diqqət yetirmək tövsiyə olunur.

Bunu Səhiyyə Nazirliyinin Respublika Sanitariya-Karantin Mərkəzinin həkim-gigiyenisti Orxan İsmayılov bildirib.

Onun sözlərinə görə, istehlakçının məhsulun təhlükəsizliyi ilə bağlı şübhəsi yarandıqda satıcıdan həmin məhsula aid gigiyenik sertifikatı tələb etmək hüququ var.

İsmayılov bildirib ki, kosmetik vasitələr dəri ilə birbaşa təmasda olduğundan onların düzgün seçilməməsi allergik reaksiyalara və dəri xəstəliklərinə səbəb ola bilər. O, qablaşdırmada istehsal və son istifadə tarixlərinin aydın göstərilməsinə diqqət yetirməyi, tarixi silinmiş məhsulları almamağı tövsiyə edib.

Gigiyenistin sözlərinə görə, qablaşdırmadakı açıq krem qabı simvolu və onun üzərindəki “6M”, “12M” kimi işarələr məhsulun qablaşdırması açıldıqdan sonra neçə ay ərzində istifadə oluna biləcəyini göstərir.

O, həmçinin kosmetik vasitələrin tərkibinin diqqətlə oxunmasının vacib olduğunu qeyd edib. Sintetik ətir maddələrinin həssas dəridə allergik reaksiyalara və qızartıya səbəb ola biləcəyini bildirən İsmayılov məhsulların tərkibinin, xüsusilə etiketin son hissəsinin diqqətlə nəzərdən keçirilməsini tövsiyə edib.

İsmayılov saxta və keyfiyyətsiz kosmetik məhsulların, xüsusilə dodaq boyası və göz kölgələrinin tərkibində ağır metalların ola biləcəyini də bildirib. Onun sözlərinə görə, kosmetik məhsulların mağazada güclü işıq və istilik mənbələrinin altında saxlanılmamasına diqqət yetirilməlidir.

Həkim-gigiyenist makiyaj və kosmetik vasitələrin başqa şəxslərlə paylaşılmamasını da tövsiyə edib.

“Makiyaj məhsullarının paylaşılması bakteriya, virus və göbələklərin bir şəxsdən digərinə keçməsinə səbəb ola bilər”, - deyə o bildirib.

Onun sözlərinə görə, xüsusilə tuş, göz qələmi, göz kölgəsi fırçaları, dodaq boyası, dodaq parıldadıcısı, dodaq qələmləri, tonal krem süngərləri və makiyaj fırçalarının ortaq istifadəsi infeksiya riskini artırır.

İsmayılov qeyd edib ki, kosmetik vasitələrin fərdi istifadəsi sağlamlıq baxımından ən təhlükəsiz seçimdir.