Valideynlərin 63%-i övladından həftədə azı bir dəfə gününün necə keçdiyini soruşur

Övladının təhsili ilə mütəmadi maraqlanan valideynlərin uşaqları PISA qiymətləndirməsinin riyaziyyat istiqamətində daha yüksək nəticə göstəriblər. Bunu elm və təhsil naziri Emin Əmrullayev PISA 2025 - Şagird Qiymətləndirilməsi üzrə Beynəlxalq Proqramın nəticələrinin təqdimatında deyib.


Valideynləri həftədə ən azı bir dəfə onlarla necə oxuduqlarını müzakirə edən şagirdlər riyaziyyat üzrə orta hesabla 449 bal toplayıb. Belə müzakirələrin heç vaxt aparılmadığı ailələrdən olan şagirdlərin nəticəsi isə 397 bal olub. Fərq 52 bal təşkil edib.

Övladının nə öyrəndiyi ilə həftədə azı bir dəfə maraqlanan valideynlərin uşaqları 451, bunu heç vaxt etməyənlərin uşaqları isə 409 bal toplayıb. Bu iki qrup arasında 42 ballıq fərq qeydə alınıb.

Valideynləri onlardan gün ərzində nə etdiklərini mütəmadi soruşan şagirdlərin orta nəticəsi 451 bal olub.

Belə ünsiyyətin olmadığı halda göstərici 413 bala düşüb - fərq 38 baldır.

PISA nəticələrinə görə, valideynlərin 63%-i övladından həftədə ən azı bir dəfə həmin gün nə etdiyini soruşur.

Valideynlərin 56%-i uşağın nə öyrəndiyi ilə maraqlanır, 55%-i isə onun necə oxuduğunu müzakirə edir.

Gülnar Nazimqızı