“Şəki yaylası”nın direktoru iki nəfərin ölümü ilə nəticələnən hadisəni küləklə əlaqələndirib

“Şəki yaylası” istirahət mərkəzinin direktoru Abbasət Məhərrəmov kanat trosunun qırılması nəticəsində iki nəfərin ölümü ilə bağlı hadisənin səbəblərindən birinin əlverişsiz hava şəraiti ola biləcəyini bildirib.

Məhərrəmov “Shimal.News”a açıqlamasında hadisə baş verməzdən əvvəl bütün təhlükəsizlik yoxlamalarının aparıldığını deyib.

“Hadisə baş verən gün hava şəraiti olduqca pis idi. Güclü külək və burulğan var idi. Hazırda dəqiq səbəb araşdırılır. İstintaqın nəticəsini gözləmək lazımdır”, - o bildirib.

Direktor hadisəni “milyonda bir baş verə biləcək” faciə adlandıraraq mərkəz rəhbərliyinin şokda olduğunu deyib.

Hadisə zamanı kanat trosunun qırılması nəticəsində 31 yaşlı Coşqun Məmmədov və 27 yaşlı Ucal Bayramov həyatını itirib. Hadisənin rəsmi səbəbi hələ açıqlanmayıb