Deputat: bəzi universitetlərdə elmi dərəcəsi olmayan müəllimlər magistrlərə dərs deyirlər

Azərbaycanda bəzi universitetlərin magistr hazırlamaq üçün kifayət qədər ixtisaslı pedaqoji heyəti yoxdur. Bunu deputat Vasif Qafarov Milli Məclisin elm və təhsil komitəsində çıxışı zamanı bildirib.

“Bir çox universitetə eyni ixtisaslar üzrə magistratura yerləri ayrılır. Lakin görürük ki, həmin universitetlərin magistr hazırlamaq və onlara dərs demək üçün yetərli pedaqoji heyəti yoxdur. Hətta bəzi universitetlərdə elmi dərəcəsi olmayan müəllimlər magistrlərə dərs deyirlər”, - Qafarov bildirib.

Onun sözlərinə görə, problem xüsusilə bəzi özəl universitetlərdə elmi dərəcəli mütəxəssislərin sayının az olması ilə bağlıdır.

Deputat magistratura üzrə ayrılan plan yerlərinin sayının da azaldılmasını təklif edib.

“Magistraturaya müraciət edənlərin sayı plan yerlərindən 3,000-4,000 nəfər azdır. Bu il də təxminən 3,000-4,000 yer boş qalıb. Tələblə təklif arasındakı balans pozulub”, - o deyib.

Qafarov magistratura təhsilinin peşə və tədqiqat istiqamətləri üzrə ayrılmasını da məqsədəuyğun sayıb.

“Dünya bu modelə çoxdan keçib. Peşə istiqaməti üzrə magistratura bir il davam edir və dissertasiya müdafiəsi tələb olunmur. Tədqiqat istiqaməti üzrə təhsil isə iki il davam edə və dissertasiya müdafiəsi ilə yekunlaşa bilər”, - deputat bildirib.

Gülnar Nazimqızı