Sabahdan Bakıda dövlət qurumlarında iş rejimi dəyişir

Bakı şəhərində və ətraf ərazilərdə yerləşən dövlət orqanları, dövlət mülkiyyətində olan və ya səhmlərinin nəzarət zərfi dövlətə məxsus hüquqi şəxslər, həmçinin dövlət adından yaradılan publik hüquqi şəxslərdə dəyişkən iş qrafiki tətbiq ediləcək.Bu barədə Əmək və Əhalinin Sosial Müdafiəsi Nazirliyi məlumat yayıb.

Bildirilib ki, dəyişkən iş qrafiki sentyabrın 15-dən etibarən iki ay müddətində sınaq məqsədilə tətbiq olunacaq.

Sınaq müddətində iş vaxtı üç rejim üzrə təşkil ediləcək: 08:00-17:00, 09:00-18:00 və 09:30-18:30. Hər bir rejim üzrə işçilərin sayının ümumi əməkdaşların ən azı 30 faizini təşkil etməsi nəzərdə tutulur.

Nazirlik bildirib ki, sınaq müddətində nəqliyyat sıxlığı aidiyyəti dövlət orqanları tərəfindən qiymətləndiriləcək. Nəticələrin təhlilindən sonra iş rejiminin təşkili ilə bağlı yekun təkliflər hazırlanacaq.

Dəyişkən iş qrafikinin tətbiqi Azərbaycan Prezidentinin sərəncamı ilə təsdiq edilmiş “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025-2030-cu illər üçün Dövlət Proqramı”nda nəzərdə tutulan tapşırığa əsasən həyata keçirilir.