Azərbaycanın bacarıq ekosistemi gücləndirilir-Alison İqlşem

 Azərbaycanın bacarıqlar ekosistemi Dünya İqtisadi Forumunun “Qlobal Bacarıqlar Sürətləndiricisi” təşəbbüsü çərçivəsində inkişaf etdirilir. Bunu Dünya İqtisadi Forumunda fəaliyyət və bacarıqlar üzrə rəhbər Alison İqlşem “Baku ID 2026” innovasiya festivalında çıxışı zamanı deyib.

Onun sözlərinə görə, 4SIM-in koordinasiya etdiyi təşəbbüs hökumət, biznes və akademik dairələri gələcəyin iqtisadiyyatı üçün tələb olunan bacarıqların formalaşdırılması məqsədilə bir araya gətirir.

İqlşem bildirib ki, 2030-cu ilə qədər işçilərin əsas bacarıqlarının 39%-nin dəyişəcəyi, qlobal işçi qüvvəsinin təxminən yarısının isə ixtisasartırmaya ehtiyac duyacağı gözlənilir.

O qeyd edib ki, analitik və yaradıcı təfəkkür, liderlik və dözümlülük kimi bacarıqlarla yanaşı, süni intellekt, böyük verilənlər və kibertəhlükəsizlik üzrə texniki bacarıqlara tələbat da artacaq.

İqlşemin sözlərinə görə, Azərbaycanın Bacarıqlar Sürətləndiricisi çərçivəsində ölkənin bacarıqlar mənzərəsi və əsas boşluqları araşdırılıb, sorğular və məsləhətləşmələr aparılıb. Bu işlərin nəticələri 4SIM-in koordinasiyası və “Mercer” şirkətinin dəstəyi ilə hazırlanmış Azərbaycanın bacarıqlar ekosisteminin sistem təhlili hesabatında əksini tapıb.

Aytac Zeynalova