Əmrullayev: Təhsil və bacarıqlarda ortaq göstəricilər əsas götürülməlidir

Dövlət və özəl sektor təhsil və bacarıqlar sahəsində fərdi KPI-lardan daha çox ortaq göstəricilərə fokuslanmalıdır. Bunu elm və təhsil naziri Emin Əmrullayev “Baku ID 2026” innovasiya festivalında çıxışı zamanı deyib.

Qarabağ Universitetində İT və texnologiya sahəsində “Nexsol” ilə həyata keçirilən işləri qeyd edən nazir bildirib ki, əsas məsələ əmək bazarının tələbatını anlamaq və səyləri bu istiqamətdə cəmləşdirməkdir.

“Problem müxtəlif qurumlar özlərinin ‘şəxsi KPI-larını’ ön plana çıxardıqda və biz ‘ortaq KPI-ları’ gözdən qaçırdıqda baş verir. Biz birləşməyə, cəmləşməyə çalışmalıyıq ki, paylaşdığımız və inkişafın nə demək olduğunu anladığımız az sayda, lakin vacib indikatorlarımız olsun”, - nazir deyib.

Onun sözlərinə görə, dövlət qurumları ilə özəl sektorun prioritetləri fərqli ola bilər və bu baxımdan onların uyğunlaşdırılması vacibdir.

Nazir SOCAR, “Paşa” və IE Biznes Məktəbi arasındakı tərəfdaşlığı, həmçinin Azərbaycan Texniki Universiteti ilə “ASELSAN Akademiyası”nın əməkdaşlığını bu istiqamətdə nümunə göstərib.

“Biz məsələləri birlikdə prioritetləşdirə bilirik. Lakin bunu bir qədər də böyük miqyasda etməliyik. Yalnız ‘tez nəticə verən’ həllərlə kifayətlənməməli, bunu Azərbaycanın sosial-iqtisadi inkişafı ilə bağlı daha geniş makro-siyasətə və gələcək strategiyalara şamil etməliyik”, - Əmrullayev bildirib.

Aytac