Şəhid valideynlərinin 65 yaşdan sonra işləməsi üçün xüsusi norma yaradılmalıdır - Naqif Həmzəyev

Deputat Naqif Həmzəyev şəhid valideynlərinin 65 yaşdan sonra əmək fəaliyyətini davam etdirməsi ilə bağlı ayrıca hüquqi mexanizmin yaradılmasını təklif edib.

O, Milli Məclisdə çıxışı zamanı 65 yaş məsələsinin ciddi problemə çevrildiyini bildirib.

“Əgər şəhid ailə üzvləri və şəhid valideynlərinin 65 yaşı tamam olubsa, gözləmək lazım deyil ki, həmin şəhid valideyn müraciət etsin və bir il işləmək hüququnun artırılmasını istəsin. Bu şəhid valideyn vətən üçün qəhrəman yetişdirib”, - Həmzəyev deyib.

Deputatın sözlərinə görə, şəhid valideynlərinin orta məktəblərdə və ali təhsil müəssisələrində fəaliyyətlərini davam etdirmələri üçün qanunvericilikdə xüsusi norma müəyyənləşdirilə bilər.

“Şəhid anası, şəhid atası, məncə, ən yaxşı tərbiyəli, vətənpərvər uşaqları yetişdirə bilərlər. Onların orta məktəblərdə və ali təhsil müəssisələrində işləmələrini biz təmin etməliyik. Hətta lazımdırsa, qanunvericilikdə xüsusi dəyişikliklər etməliyik, bir norma formalaşdırmalıyıq ki, həmin şəxslər müraciət etməsin”, - deputat bildirib.

Həmzəyev bu məsələ ilə bağlı konkret problemlərlə qarşılaşdıqlarını da deyib.

“Belə bir problemlərlə biz qarşılaşdıq. Açığı deyim, mən özüm də utandım. Düzdür, aidiyyəti qurumlar operativ yanaşdılar. Ancaq belə bir şey olmamalı idi. Heç bu şəhid anası bu həddə gəlib çatmamalı idi ki, dərsə bir gün qalmış ona məlum olsun ki, dərs verməyiblər”, - deputat qeyd edib.

O, problemin qanunvericilik səviyyəsində həll edilməsinin vacibliyini vurğulayıb.

Gülnar Nazimqızı