Həmzəyev: Azərbaycan vətəndaşlarına AZAL biletlərində ildə bir dəfə güzəşt tətbiq edilsin

Deputat Naqif Həmzəyev Azərbaycan vətəndaşlarının AZAL-ın endirimli aviabiletlərindən daha geniş istifadə edə bilməsi üçün ildə ən azı bir dəfə güzəşt hüququnun verilməsini təklif edib.

O, Milli Məclisdə çıxışı zamanı AZAL-ın gəlirlərinin artmasını müsbət qiymətləndirib.

“Biz sevinirik ki, AZAL-ın gəlirləri artıb, AZAL artıq gəlirlə işləyən bir müəssisəyə çevrilib. Mən sevinirəm buna. Bunun da müəyyən səbəbləri var. Qonşu regionlarda, qonşu ölkələrdə baş verən müharibə və münaqişələr fonunda həmin ölkələrin vətəndaşları AZAL vasitəsilə xaricə çıxış əldə edirlər”, - Həmzəyev deyib.

Deputat bildirib ki, xarici vətəndaşlar AZAL-ın biletlərini əvvəlcədən alaraq endirimlərdən yararlana bildikləri halda, Azərbaycan vətəndaşları həmin güzəştli biletləri əldə etməkdə çətinlik çəkirlər.

“Bir növ biz Azərbaycan vətəndaşlarının istirahət hüquqlarını pozuruq. Mən təklif edirəm, Zahit müəllim, Azərbaycan vətəndaşlarına ən azı ildə bir dəfə bir istiqamət üzrə bu endirimli biletləri almaq hüququnu AZAL tanısın”, - deputat bildirib.

Həmzəyev tələbələrə tətbiq olunan güzəştlərin digər vətəndaşlara da şamil edilməsini təklif edib.

“Bir vətəndaş onsuz da ildə bir dəfə məzuniyyətdə olur, bir dəfə istirahətə getmək istəyir. Heç olmasa həmin bir dəfə vətəndaşın endirimli qiymətə xaricə gedib istirahət etmək hüququ tanınsın”, - deputat deyib.

Gülnar Nazimqızı