Bakıda 4 milyon manatdan çox dəyəri olan brilyant qaşlar aşkarlanıb

Bakıda gömrük nəzarətindən gizlədilərək ölkəyə gətirilməyə cəhd edilən 2 502,524 karat brilyant qaşlar aşkarlanıb. Qiyməti 4 milyon manatdan çox olan qiymətli daşlar Qazaxıstan vətəndaşının üzərindən götürülüb.

Dövlət Gömrük Komitəsinin Hava Nəqliyyatında Baş Gömrük İdarəsinin əməkdaşları tərəfindən keçirilən əməliyyat zamanı Şarja-Bakı aviareysi ilə ölkəyə gələn Qazaxıstan vətəndaşı “Yaşıl Kanal” buraxılış sistemindən keçərək gömrük nəzarəti zonasını tərk etmək istəyib.

Gömrük əməkdaşları sərnişinin davranışlarından şübhələndikləri üçün onu “Qırmızı Kanal”a yönləndirərək gömrük nəzarəti formalarından keçiriblər.

Yoxlama zamanı vətəndaşın üzərindən gömrük orqanına bəyan edilməyən və gömrük nəzarətindən gizlədilən 2 502,524 karat brilyant qaşlar aşkar olunub.

Gömrük orqanının məlumatına görə, aşkar edilmiş qiymətli daşların ümumi dəyəri 4 milyon manatdan çoxdur.

Faktla bağlı araşdırma aparılır.