Qubad İbadoğlu üzərində polis nəzarəti ləğv edilib, o, Almaniyaya gedib

İqtisadçı Qubad İbadoğlu barəsində seçilmiş “polisin nəzarəti altına vermə” qətimkan tədbiri ləğv edilib və o, təcili əməliyyat olunmaq üçün Almaniyaya gedib.  Bunu İbadoğlunun vəkili Zibeydə Sadıqova bildirib.

Onun sözlərinə görə, qərar İbadoğlunun səhhətində yaranmış ciddi problemlər nəzərə alınaraq istintaq orqanı tərəfindən qəbul edilib.

“Qubad İbadoğlu bugün səhər Almaniyaya gedib. Səhhəti ilə təcili əməliyyat olunmalıdır. Ölkədən çıxışına olan qadağa aradan götürülüb. İstinaq orqanı tərəfindən polis nəzarətinə vermə qətiimkan ləğv edilib", - vəkil deyib.

İbadoğlu 2023-cü il iyulun 23-də saxlanılıb və Cinayət Məcəlləsinin mütəşəkkil dəstə tərəfindən saxta pul və ya qiymətli kağız hazırlama, əldə etmə və satmanı nəzərdə tutan 204.3.1-ci maddəsi ilə ittiham olunub.

Daha sonra ona dini ekstremist materialları hazırlama, saxlama və ya yayma maddəsi üzrə əlavə ittiham irəli sürülüb. İbadoğlu ittihamları qəbul etməyib.

O, 2024-cü ilin aprelində həbsdən ev dustaqlığına buraxılmışdı.  Sonradan qətimkan tədbiri “polisin nəzarəti altına vermə” ilə əvəz edilmişdi.

Vəkilin sözlərinə görə, cinayət işi üzrə istintaq davam edir və hələ yekun qərar qəbul edilməyib.

Aytac Zeynalova