Kamran Əliyev Rusiyanın Ali Məhkəməsinin sədrinə yubiley medalı təqdim edib

Azərbaycanın Baş prokuroru Kamran Əliyev Rusiyanın Ali Məhkəməsinin sədri İqor Krasnova “Azərbaycan Prokurorluğunun 100 illiyi (1918–2018)” yubiley medalını təqdim edib.

Bu barədə Azərbaycan Baş Prokurorluğu məlumat yayıb.

Bildirilib ki, sentyabrın 29-da Moskvada Kamran Əliyevlə İqor Krasnov arasında görüş keçirilib.

Görüşdə Azərbaycan və Rusiya arasında münasibətlərin inkişafında iki ölkənin dövlət başçıları arasında formalaşmış dostluq və qarşılıqlı etimada əsaslanan əlaqələrin rolu qeyd olunub. Tərəflər ölkələr arasında münasibətlərin strateji tərəfdaşlıq və müttəfiqlik prinsipləri əsasında inkişaf etdiyini vurğulayıblar.

Kamran Əliyev iki ölkənin prokurorluq orqanları arasında uzun illər ərzində formalaşmış əməkdaşlığın yüksək səviyyədə olduğunu bildirib. O, qarşılıqlı hüquqi yardım, cinayətkarlıqla mübarizə, təcrübə və məlumat mübadiləsi istiqamətlərində əməkdaşlığın həyata keçirildiyini qeyd edib.

Görüşdə Azərbaycan və Rusiya arasında hüquq sahəsində əlaqələrin gələcək inkişaf perspektivləri, institusional əməkdaşlığın gücləndirilməsi, qarşılıqlı təcrübə mübadiləsi, hüquq təhsili və kadr hazırlığı məsələləri müzakirə olunub.

Tərəflər həmçinin birgə elmi-praktiki tədbirlərin və təlimlərin keçirilməsi, eləcə də təcrübə mübadiləsinin genişləndirilməsi imkanlarını nəzərdən keçiriblər.

İqor Krasnov azərbaycanlı həmkarları ilə konstruktiv və uzunmüddətli əməkdaşlığın inkişafında maraqlı olduqlarını bildirib və görüşün iki ölkənin müvafiq qurumları arasında əlaqələrin daha da möhkəmlənməsinə töhfə verəcəyini deyib.