Fermerlər müflis ola bilər - fındıq qiymətləri ilə bağlı deputatdan təklif

Azərbaycanda fındıq istehsalçılarını müflisləşmə riskindən qorumaq üçün istehsal xərclərini qarşılayan və minimum gəlirliliyi təmin edən aşağı qiymət həddinin tətbiqi təklif olunur. Bunu deputat Əli Məsimli Milli Məclisdə çıxışı zamanı deyib.

Onun sözlərinə görə, Şəki-Zaqatala iqtisadi rayonunda fındığın qiyməti iki dəfəyədək ucuzlaşıb, ziyanvericilər isə təsərrüfatlara ciddi zərər vurub. Nəticədə bəzi fermerlər gəlir əldə etmir və ya onların qazancı minimum səviyyəyə düşüb.

“Xüsusən qiymətlərin aşağı olduğu illərdə fermerlərin müflisləşməməsi üçün dövlət tərəfindən istehsal xərclərini sığortalayan və minimum gəlirliliyi təmin edən taban qiyməti mexanizminin tətbiqi məqsədəuyğun olardı”, - deputat bildirib.

Əli Məsimli fermerlərə maliyyə dəstəyinin məhsul yığımı zamanı deyil, istehsalın ilkin mərhələsində verilməsini də təklif edib. Onun fikrincə, bu addım məhsuldarlığın və fermer gəlirlərinin artmasına kömək edə bilər.

Deputat ziyanvericilərin və təbii fəlakətlərin kənd təsərrüfatına təsirini azaltmaq üçün Aqrar Sığorta Fondunun bitkiçilik üzrə sığorta xidmətlərinin əhatə dairəsinin genişləndirilməsini vacib sayıb.
Əli Məsimli çıxışında Sahibkarlıq, Büdcə və Borc məcəllələrinin hazırlanaraq qəbul edilməsini, həmçinin Vergi Məcəlləsinin yenilənməsini təklif edib.

O, 31 il əvvəl qəbul olunmuş “İstehlakçıların hüquqlarının müdafiəsi haqqında” Qanunun icra mexanizmlərinin zəif olduğunu da bildirib. Deputat müasir tələblərə cavab verən yeni qanunun qəbul edilməsini məqsədəuyğun hesab edib.

“Vətəndaş aldığı malı 14 gün ərzində qaytarmaq və ya dəyişmək hüququna malikdir. Təəssüf ki, bir çox hallarda vətəndaşlar bu hüquqdan istifadə edə bilmirlər”, - Əli Məsimli qeyd edib.

Gülnar Nazimqızı