Kanat yollarında sərnişindaşıma “Bakı Metropoliteni”nə həvalə edilir

Prezident İlham Əliyev “Bakı Metropoliteni” QSC-nin yenidən təşkili ilə bağlı 7 may 2026-cı il tarixli Fərmanda dəyişiklik edib. Dəyişikliyə əsasən, “Bakı Metropoliteni” QSC sərnişin kanat yolları sahəsində də fəaliyyət göstərəcək.

Bununla bağlı dövlət başçısı yeni Fərman imzalayıb.

Sənədə əsasən, “Bakı Metropoliteni” QSC sərnişin kanat yolları sahəsində sərnişindaşıma xidmətlərinin göstərilməsini, bu xidmətlərin keyfiyyətinin və təhlükəsizliyinin artırılmasını, onların təşkili və gediş haqqının ödənilməsi üzrə innovativ və rəqəmsal həllərin tətbiqini təmin edəcək.

QSC-yə həmçinin sərnişin kanat yollarının layihələndirilməsi, tikintisi və istismarı, maddi-texniki bazanın gücləndirilməsi və müasirləşdirilməsi, müxtəlif nəqliyyat xidmətlərinin qarşılıqlı inteqrasiyası, vahid mərkəzdən idarə olunması və əlaqələndirilməsi ilə bağlı səlahiyyətlər verilib.

Prezidentin 7 may 2026-cı il tarixli Fərmanı ilə “Bakı Metropoliteni” QSC “BakuBus” MMC və “Bakı Taksi Xidməti” MMC-nin ona qoşulması formasında yenidən təşkil edilib. Həmin sənədlə metro, avtobus, tramvay və taksi xidmətlərinin vahid mərkəzdən idarə olunması nəzərdə tutulub.