DTX süni intellekt vasitəsilə həyata keçirilən kiberdələduzluq halları ilə bağlı növbəti xəbərdarlıq yayıb

Son dövrlərdə ölkə hüdudlarından kənarda fəaliyyət göstərən mütəşəkkil kibercinayətkar qrupların süni intellekt texnologiyalarından istifadə etməklə yeni və təkmilləşdirilmiş kiberhücumlar həyata keçirdiyi müşahidə olunur.Bu barədə Dövlət Təhlükəsizliyi Xidməti (DTX) məlumat yayıb.

DTX-nin məlumatına görə, kibercinayətkar qruplar süni intellekt alqoritmləri və xüsusi proqram təminatlarından istifadə etməklə dövlət qulluqçularını, müxtəlif müəssisə və təşkilatların əməkdaşlarını, eləcə də vətəndaşları hədəfə alırlar.

Məlumata görə, kibercinayətkarlar əvvəlcədən hazırlanmış ssenarilər əsasında hədəfə alınan şəxslərə “təcili” və “vacib” məzmunlu mesajlar göndərir, daha sonra onları hüquq-mühafizə orqanlarının və ya digər dövlət qurumlarının adından fəaliyyət göstərən saxta hesablara yönləndirirlər.

Həmin şəxslərdən xarici hesablara pul köçürülməsi və ya digər qanunsuz tapşırıqların yerinə yetirilməsi tələb olunur.

DTX vətəndaşları rəqəmsal mühitdə şübhəli müraciət, tələb və mesajlara qarşı diqqətli olmağa, belə hallarla qarşılaşdıqda isə dərhal hüquq-mühafizə orqanlarına məlumat verməyə çağırıb.