Vurulan gəminin kapitanı Rüstəm Həsənov ehtiyatda olan 2-ci dərəcəli kapitan olub

Rumıniya sahilləri yaxınlığında dron hücumuna məruz qalan “Royad Məmmədov” yük gəmisinin kapitanı Rüstəm Həsənov ehtiyatda olan 2-ci dərəcəli kapitan - polkovnik-leytenant olub. O, hücum nəticəsində həlak olub.

Xarici İşlər Nazirliyinin oktyabrın 6-da yaydığı məlumata görə, 1974-cü il təvəllüdlü Həsənov Rüstəm İsmayıl oğlu gəminin kapitanı olub.

Nazirlik gəmidəki digər Azərbaycan vətəndaşı, 2002-ci il təvəllüdlü Məhəmməd Süleymanzadənin itkin düşdüyünü bildirib.

Heyətin digər üzvləri xilas edilib, onlardan üçü xəstəxanaya yerləşdirilib.

Gəmi oktyabrın 5-də Qara dənizdə, Rumıniya sahilləri yaxınlığında hücuma məruz qalıb. Rumıniya rəsmiləri gəmidə yanğın baş verdiyini və heyət üzvlərinin xilas edildiyini açıqlayıb. Ukrayna Prezidenti Volodimir Zelenski isə gəmiyə iki Rusiya dronunun zərbə endirdiyini bildirib.

Gülnar Nazimqızı