2025-ci ildə korrupsiya barədə müraciətlərin 8,9 faizi işçilərdən daxil olub - deputat

Korrupsiyaya qarşı Mübarizə üzrə Komissiyanın təhlilinə görə, 2025-ci ildə korrupsiya ilə bağlı daxil olan 5 702 müraciətin 508-i - 8,9 faizi - işçilərin öz iş yerlərində baş verdiyini bildirdikləri hüquqpozmalarla bağlı olub. Bunu  deputat Kamal Cəfərov deyib. 

Cəfərovun sözlərinə görə, hazırkı qanunvericilikdə məlumat verənlərin müdafiəsi ilə bağlı müddəalar müxtəlif aktlarda əksini tapıb, mükafatlandırma mexanizmi isə nəzərdə tutulmayıb. Yeni layihədə məlumat təsdiqlənərsə, işçiyə təşkilatın büdcəsi hesabına mükafat ödənilməsi təklif olunur.

Deputat bildirib ki, layihə işçiyə korrupsiya barədə məlumatı təşkilatın səlahiyyətli strukturuna, rəhbərinə, yuxarı vəzifəli şəxsə və ya ixtisaslaşmış prokurorluq qurumlarına vermək imkanı yaradır. “Onun seçimi var. İstəsə, məlumatı birbaşa korrupsiyaya qarşı mübarizə sahəsində ixtisaslaşmış quruma verə bilər”, - Cəfərov qeyd edib.

Layihəyə əsasən, məlumat verdiyinə görə işçiyə intizam tənbehi tətbiq etmək, onu vəzifəsindən azad etmək və ya başqa işə keçirmək olmaz. Bilə-bilə yalan və böhtan xarakterli məlumatlar isə korrupsiya barədə məlumatvermə sayılmır.

Gülnar Nazimqızı