Lerikdə iki yol qəzasında üç nəfər xəsarət alıb

Lerik rayonunda iki ayrı yol-nəqliyyat hadisəsi baş verib, nəticədə üç nəfər xəsarət alıb.

"Report"un məlumatına görə, qəzalardan biri Lerik-Zuvand yolunun Blabənd kəndi ərazisində qeydə alınıb.

Sadiq Novruzovun idarə etdiyi "VAZ-2121" ("Niva") markalı avtomobil hərəkətdə olarkən "UAZ" markalı nəqliyyat vasitəsi ilə toqquşub. Nəticədə "Niva"da olan üç nəfər xəsarət alıb.

Onlardan 1963-cü il təvəllüdlü, Pirəsora kənd sakini Fədail Bəbir oğlu Bağırov Lənkəran Rayon Mərkəzi Xəstəxanasına çatdırılıb. İlkin tibbi yardım göstərildikdən sonra o, reanimasiya şöbəsinə yerləşdirilib. Digər iki nəfərin xəsarətləri yüngül olub.

Digər qəza Lənkəran-Lerik magistralının 39-cu kilometrində baş verib. Zenoni kənd sakini, 1985-ci il təvəllüdlü Həmid Heybət oğlu Dövlətovun idarə etdiyi "VAZ-2107" markalı avtomobil idarəetmədən çıxaraq yol kənarındakı ağaca çırpılıb.

Qəza nəticəsində sürücü və onun həmkəndlisi, 1996-cı il təvəllüdlü İsmayıl Maşallah oğlu Əliyev müxtəlif dərəcəli bədən xəsarətləri alıblar. Onlar Lənkəran Rayon Mərkəzi Xəstəxanasına çatdırılıblar.

Hər iki faktla bağlı araşdırma aparılır.