Sumqayıt Uşaq Xəstəxanasında 11 uşaqda allergiya hadisəsi ilə bağlı araşdırma aparılır - RƏSMİ

TƏBİB və Səhiyyə Nazirliyinin mütəxəssisləri Sumqayıt Tibb Mərkəzinin nəzdindəki Uşaq Xəstəxanasında stasionar müalicə alan 11 uşaqda dərman allergiyasının yaranması ilə bağlı araşdırma aparır.Bu barədə “Report”a  TƏBİB-dən bildirilib.

İstifadə olunan dərman vasitəsindən nümunələr götürülüb.

Məlumata görə, uşaqlara dərhal zəruri tibbi yardım göstərilib. Hazırda onların vəziyyəti stabil qiymətləndirilir və diaqnozlarına uyğun müalicələri davam etdirilir.

Uşaqlardan dördünün vəziyyəti qənaətbəxş hesab edilib və onlar ambulator müalicə üçün evə buraxılıblar.

Uşaqlar hadisədən əvvəl respirator virus infeksiyası səbəbindən xəstəxanada müalicə alıblar.