Bakının bir sıra küçə və prospektlərində nəqliyyatın hərəkəti müvəqqəti tənzimlənəcək

Oktyabrın 11-də Bakının bir sıra küçə və prospektlərində nəqliyyatın hərəkəti müvəqqəti tənzimlənəcək.Bu barədə Daxili İşlər Nazirliyinin mətbuat xidməti məlumat yayıb.

Bildirilib ki, oktyabrın 15-də Bakıda keçiriləcək beynəlxalq tədbirə hazırlıq çərçivəsində nəqliyyat axınının təhlükəsiz və səmərəli idarə olunması məqsədilə nəqliyyat vasitələrinin hərəkəti üzrə təlim keçiriləcək.

Təlimlə əlaqədar oktyabrın 11-də saat 08:00-dan 13:00-dək paytaxtın bir sıra küçə və prospektlərində müvəqqəti tənzimləmələr tətbiq ediləcək.

Təlim Mehdi Hüseyn, İstiqlaliyyət, Zərifə Əliyeva, Üzeyir Hacıbəyli, İzzəddin Həsənoğlu, Yusif Səfərov, Gülarə Qədirbəyova və Niyazi küçələrini, eləcə də Neftçilər və Heydər Əliyev prospektlərini əhatə edəcək.

Sürücülərə səfərlərini əvvəlcədən planlaşdırmaq, mümkün nəqliyyat sıxlığını nəzərə almaq və alternativ yollardan istifadə etmək tövsiyə olunub.