Rəşad Mahmudov elmi yaradıcılıq üçün icazə tələbinin ləğvini təklif edib

Deputat Rəşad Mahmudov “Dövlət Qulluğu Məcəlləsi” layihəsində elmi yaradıcılıqla bağlı maddəyə yenidən baxılmasını və bu fəaliyyət üçün rəhbərliyin icazəsi ilə bağlı tələbin aradan qaldırılmasını təklif edib.

Mahmudov Milli Məclisin iclasında qanun layihəsinin ikinci oxunuşu zamanı bildirib ki, belə bir məhdudiyyət alimlərin və yüksək ixtisaslı mütəxəssislərin fəaliyyətinə mane ola bilər.

“Ümumiyyətlə, elmi yaradıcılıqda belə bir məhdudiyyətin qoyulması gələcəkdə ölkəmizdə istənilən sahədə, eləcə də dövlət quruculuğunda elmi əsaslara dayanan düşüncənin formalaşmasının qarşısını ala biləcək maneələrdən biri kimi qarşımıza çıxacaq”, - Mahmudov bildirib.

Deputatın sözlərinə görə, xaricdə təhsil almış və akademik təcrübə qazanmış həkimlər elmi yazılarını aidiyyəti qurumlara təqdim etməkdə çətinlik çəkirlər.

O, əvvəllər baş vermiş xoşagəlməz hadisələrə görə tətbiq edilən məhdudiyyətlərin hazırda da elmə, təhsilə və mütəxəssislərin inkişafına mane olmasını qəbuledilməz hesab etdiyini bildirib.

Mahmudov qanun layihəsinin ikinci oxunuşunu ümumilikdə dəstəklədiyini, lakin rəhbərliyin icazəsi ilə bağlı tələbin yarada biləcəyi maneələr nəzərə alınaraq müvafiq maddənin dəyişdirilməsini tövsiyə edib.

Gülnar Nazimqızı