Xəstəxanadan beş ruhi xəstə qaçmaq istəyibmiş - Foto

Onlardan birini hadisədən bir gün sonra intihar edən polis əməkdaşı zərərsizləşdirib

Bakıda ruhi xəstəxanadan qaçan şəxslər hələ tutulmayıb. APA-nın məlumatına görə, polis həmin şəxslərin əvvəllər müxtəlif cinayətlər törətməkdə təqsirləndirildiklərini əsas gətirərək, onların təhlükəli olduğunu nəzərə almaqla əhalidən kömək istəyir. Şəkildəki şəxsləri tanıyan və görənlərdən bu barədə dərhal Daxili İşlər Nazirliyinin 102 xidmətinə məlumat vermələri xahiş olunur.

APA noyabrın 15-də Maştağa qəsəbəsində yerləşən 1 saylı Ruhi Psixiatriya Xəstəxanasından xəstələr qaçan zaman baş verən hadisələrin bəzi detallarını da əldə edib. Belə ki, həmin gün xəstəxanadan qaçmaq istəyənlərin sayı 5 nəfər olub. Onlardan biri xəstəxanada xidmətdə olan, hadisədən bir gün sonra intihar edən polis əməkdaşı Rəşad Həsənov tərəfindən zərərsizləşdirilib. Polis əməkdaşı qaçan digər şəxsləri də zərərsizləşdirməyə çalışsa da, buna nail ola bilməyib. İlkin ehtimala görə, polis əməkdaşı bunun məsuliyyətini hiss etdiyi üçün özünü yaşadığı binadan ataraq intihar edib.   

Qeyd edək ki, noyabrın 15-də saat 06.15 radələrində Maştağa qəsəbəsində yerləşən 1 saylı Ruhi Psixiatriya Xəstəxanasında müalicə olunan, Cinayət Məcəlləsinin 177, 178, 181 və 310-cu maddələri ilə təqsirləndirilən Binəqədi rayon sakini Tural Abbasov, Cinayət Məcəlləsinin 177-ci maddəsi ilə təqsirləndirilən Elvin Nəsrullayev və Cinayət Məcəlləsinin 181-ci maddəsi ilə təqsirləndirilən Xırdalan şəhər sakini Razim Hacıyev və Şahbuz rayon sakini Yusif Məhərrəmov orada xidmətdə olan Sabunçu Rayon Mühafizə İdarəsinin əməkdaşları - polis serjantı Vasif Rzaquliyevə və mülki mühafizəçi Tahir Dərgahova dəmir parçası ilə müqavimət göstərərək qapının qıfılını sındırıb oradan qaçıblar. Onların tutulması üçün müvafiq tədbirlər görülür.

ANN.Az