Azərbaycanda pərakəndə ticarət dövriyyəsi 3,8 faiz artıb

2026-cı ilin yanvar-sentyabrda Azərbaycanda pərakəndə ticarət şəbəkəsində 50,8 milyard manatlıq məhsul satılıb. Bu, ötən ilin eyni dövrü ilə müqayisədə real ifadədə 3,8 faiz çoxdur. Bu barədə Dövlət Statstika Komitəsindən bildirilib. 

Satılan məhsulların 27,5 milyard manatını ərzaq məhsulları, içkilər və tütün məmulatları, 23,3 milyard manatını isə qeyri-ərzaq malları təşkil edib.

Hesabat dövründə ərzaq məhsulları, içkilər və tütün məmulatlarının satışında real ifadədə 1,4 faiz, qeyri-ərzaq mallarının satışında isə 6,7 faiz artım qeydə alınıb.

Pərakəndə ticarətdə istehlakçıların xərclərinin 49,9 faizi ərzaq məhsullarının, 4,2 faizi içkilər və tütün məmulatlarının alınmasına yönəlib. Xərclərin 13,4 faizi toxuculuq məhsulları, geyim və ayaqqabıların, 6 faizi avtomobil yanacağının, 5,1 faizi elektrik malları və mebellərin, 2,7 faizi əczaçılıq məhsulları və tibbi ləvazimatların, 1,6 faizi kompüterlər, telekommunikasiya avadanlıqları və çap məhsullarının payına düşüb. Digər qeyri-ərzaq mallarına xərclərin 17,1 faizi sərf olunub.

Yanvar-sentyabrda əhali pərakəndə ticarət şəbəkəsində adambaşına orta hesabla ayda 549,2 manat xərcləyib. Bunun 297,2 manatı ərzaq məhsulları, içkilər və tütün məmulatlarının, 252 manatı isə qeyri-ərzaq mallarının alınmasına sərf edilib.

Gülnar Nazimqızı