Vüqar Zifəroğlu Mətbuat Şurasının yeni sədri seçilib

Vüqar Zifəroğlu Azərbaycan Jurnalistlərinin IX Qurultayında Mətbuat Şurasının (MŞ) yeni sədri seçilib.

Qurultayda Mətbuat Şurası İdarə Heyətinin qərarı ilə Zifəroğlunun namizədliyi sədr vəzifəsinə irəli sürülüb. Səsvermənin nəticələrinə əsasən, o, qurumun yeni sədri seçilib.

Rəşad Məcid 24 sentyabr 2022-ci ildə Azərbaycan Jurnalistlərinin VIII Qurultayında Mətbuat Şurasının sədri seçilmişdi. O, bu vəzifədə 2003-cü ildən quruma rəhbərlik edən Əflatun Amaşovu əvəz etmişdi.

Azərbaycan Mətbuat Şurası 15 mart 2003-cü ildə jurnalistlərin I Qurultayında 180-dək aparıcı kütləvi informasiya vasitəsinin təsisçiliyi ilə yaradılıb. Qurum həmin il aprelin 24-də Ədliyyə Nazirliyində dövlət qeydiyyatına alınıb.

Mətbuat Şurası Azərbaycanda medianın özünütənzimləmə orqanı kimi fəaliyyət göstərir. Onun əsas məqsədləri jurnalistlərin peşə etikası prinsiplərinə əməl etməsinə ictimai nəzarət, media ilə dövlət qurumları və ictimaiyyət arasında əlaqələrin möhkəmləndirilməsi, eləcə də mətbuatla bağlı şikayətlərin araşdırılmasıdır.

Gülnar Nazimqızı