Razi Nurullayev iş gününün məhsuldarlıq hesabına qısaldılmasını təklif edib

Deputat Razi Nurullayev iş saatlarında məhsuldarlığın artırılması hesabına iş gününün müddətinin tədricən azaldılmasını təklif edib. O, işin xarakteri imkan verən sahələrdə çevik qrafikə keçilməsini və işçilərin nəticələr əsasında qiymətləndirilməsini vacib sayıb.

“Bu gün bir çox iş yerlərində əsas diqqət işçinin saat neçədə gəlib neçədə çıxmasına yönəlir. Halbuki əsas məsələ işçinin gün ərzində hansı nəticəni əldə etməsi olmalıdır”, - Nurullayev çıxışı zamanı deyib.

Onun sözlərinə görə, işin təşkilində və idarəetmədəki problemlər, eləcə də lazımsız bürokratik prosedurlar işlərin uzanmasına səbəb ola bilər. Deputat işin xarakteri imkan verirsə, işçilərin daha tez başlayıb daha tez işdən çıxmasına şərait yaradılmasını təklif edib.

Nurullayev bu yanaşmanın bütün sahələrdə tətbiqinin mümkün olmadığını, fasiləsiz xidmət və konkret iş saatları tələb edən sahələrin olduğunu qeyd edib. “Müasir əmək münasibətlərinin gələcəyi daha çox saat işləməkdə deyil, daha səmərəli işləməkdədir”, - o bildirib.

Gülnar Nazimqızı