Hafiz Səfixanov: İkinci Qarabağ müharibəsindən sonra 400-dən çox şəxs mina qurbanı olub

İkinci Qarabağ müharibəsindən sonra Azərbaycanda 400-dən çox şəxs mina qurbanı olub, onlardan 73-ü həlak olub. Bunu “Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov bildirib.

Onun sözlərinə görə, həlak olanların 58-i mülki şəxslərdir. Onların arasında qadınlar və uşaqlar da var.

Səfixanov qeyd edib ki, son hadisələrin təhlili insanların hələ də icazə verilməyən ərazilərə daxil olduğunu və mina təhlükəsizliyi ilə bağlı tövsiyələrə əməl etmədiyini göstərir.

“İnsanlarımız maariflənməli və maarifləndirmə tədbirlərində aldıqları məlumatlara, tövsiyələrə ciddi əməl etməlidirlər, özfəaliyyətlə məşğul olmamalıdırlar”, – o vurğulayıb.

O, minaları dünyanın ən qeyri-humanist silahlarından biri adlandırıb və onların uzun illər torpağın altında qalaraq mülki şəxslər üçün təhlükə yaratdığını bildirib.

Səfixanov qeyd edib ki, minalar digər silahlardan fərqli olaraq, qurbanları arasında fərq qoymur və təhlükə uzun müddət davam edir.

Aytac