Aİ şirkətlərinin 52 %-i Azərbaycanda biznesini genişləndirməyi planlaşdırır

Avropa İttifaqı (Aİ) şirkətlərinin 52 %-i Azərbaycanda biznesini genişləndirməyi, 25 %-i isə qarşıdakı illərdə mövcud fəaliyyətini qorumağı planlaşdırır. Bunu Aİ-Azərbaycan Biznes Forumunun 2024–2026-cı illər üzrə qrup rəhbəri Aytən Axundova bildirib.

Onun sözlərinə görə, Aİ şirkətlərinin 57 %-i Azərbaycandakı iqtisadi vəziyyəti qənaətbəxş qiymətləndirir. Bununla belə, ümumi göstəricilər ötən illə müqayisədə bir qədər aşağıdır. Bu, regiondakı geosiyasi vəziyyətlə əlaqəli ola bilər.

Axundova bildirib ki, şirkətlər siyasi və sosial sabitliyi, enerji resurslarının etibarlılığını və qiymətini, həmçinin logistika və nəqliyyat əlaqələrinin səmərəliliyini müsbət amillər kimi qiymətləndirirlər.

O qeyd edib ki, şirkətlərin 42 %-i gömrük prosedurlarını çətin hesab edir. Onların 9 %-i prosedurları həddindən artıq çətin, 33 %-i isə kifayət qədər çətin qiymətləndirib. Respondentlərin 36 %-i neytral mövqe nümayiş etdirib, cəmi 3 %-i isə gömrük prosedurlarını çox əlverişli hesab edib.

Axundovanın sözlərinə görə, gömrük əməliyyatlarının rəqəmsallaşdırılması səmərəliliyi artırsa da, rüsumlar və mürəkkəb prosedurlar şirkətlər üçün problem olaraq qalır.

Hesabatda əsas çağırışlar sırasında peşə təhsili və təliminin keyfiyyəti, maliyyəyə çıxış, biznes etikası və ödəniş intizamı, yeni texnologiyalara çıxış, eləcə də elmi-tədqiqat və inkişaf sahələri göstərilib.

Aytac