Abşeronda oğurluq anbaan kameralara düşdü - VİDEO

Abşeron rayon sakini Firdovsi Quliyevə məxsus mağaza qarət olunub.

ANN.Az ANS TV-yə istinadən xəbər verir ki, ailəsini bu mağaza ilə dolandırdığını deyən zərərçəkən, hadisənin səhər saatlarında törədildiyini deyir.

Oğurluğa gələn şəxs əvvəlcə mağazanın əsas qapısını açmağa çalışıb. Lakin buna nail ola bilməyincə obyektin binanın tinində olan pəncərəsini mişar daşı ilə qırıb içəri daxil olub. Mağazanı qarət edən şəxsin görüntüləri isə anbaan mağazadakı kameranın yaddaşına həkk olunub.

Zərərçəkənin iddiasına görə, bu hadisəni törətmək tək adamın işi deyil. Üzünü xüsusi maska ilə gizlədən şəxs çox rahatlıqla obyektdə gəzir və özünü kameradan yayındırmağa çalışır. Amma sonda izi itirmək məqsədilə kameraya müdaxilə etməyə cəhd edir.

Mağazanı qarət edən naməlum şəxs daha sonra müşahidə kameralarının bazasını axtarmağa çalışıb. Lakin bazanı tapa bilməyən həmin şəxs onu qırmağa çalışıb.

15-20 dəqiqə ərzində mağazada var-gəl edən naməlum şəxs obyekt sahibinə məxsus bir xeyli texnika aparmağa müvəffəq olub.

Zərərçəkən Firdovsi Quliyev deyir ki, 17 ədəd noutbuk və bir neçə ədəd səs gücləndirici yoxdur, ümumilikdə 7 min manat ziyan vurulub.

Məlum oğurluq faktı ilə bağlı Abşeron Rayon Polis Şöbəsində cinayət işi başlanılıb. Obyektə quraşdırılan kamera görüntüləri də istintaqa təhvil verilib. Şöbədən aldığımız məlumata görə, hazırda həmin oğurluq cinayətilə bağlı əməliyyat istintaq qrupu yaradılıb. Odur ki, Firdovsi Quliyev ümidini üzmədən polislərdən gələcək şad xəbəri gözləməlidir.

ANN.Az