Azərbaycanda yeni universitet yaradılır

Azərbaycan prezidenti İlham Əliyev Turizm və Menecment Universitetinin yaradılması haqqında sərəncam imzalayıb.

ANN.Az AzərTAc-a istinadən məlumatına görə, sərəncama əsasən, Mədəniyyət və Turizm Nazirliyinin Turizm İnstitutunun bazasında ali təhsilin bütün pillələrində turizm və menecment sahələri üzrə kadr hazırlığını həyata keçirən Mədəniyyət və Turizm Nazirliyinin tabeliyində Azərbaycan Turizm və Menecment Universiteti yaradılacaq.

Nazirlər Kabinetinə Turizm və Menecment Universitetinin nizamnaməsinin layihəsini 3 ay müddətində hazırlayıb prezidentə təqdim etmək; prezidentin aktlarının bu sərəncama uyğunlaşdırılmasına dair təkliflərini hazırlayıb 3 ay müddətində prezidentə təqdim etmək; mərkəzi icra hakimiyyəti orqanlarının normativ hüquqi aktlarının bu sərəncama uyğunlaşdırılmasını nəzarətdə saxlamaq və bunun icrası barədə 3 ay müddətində prezidentə məlumat vermək tapşırılıb.

Nazirlər Kabineti Azərbaycan Turizm və Menecment Universitetinin  təhsilin bütün pillələrini əhatə edən, turizm və menecment sahələri üzrə kadr hazırlayan aparıcı təhsil mərkəzi kimi fəaliyyətinin maliyyələşdirilməsi və maddi-texniki təminatı, o cümlədən müvafiq tədris şəhərciyinin yaradılması ilə bağlı təklifləri 2 ay müddətində dövlət başçısına təqdim etməlidir.

ANN.Az